2Ch 33 | Ndebele | STEP | UManase wayeleminyaka elitshumi lambili esiba yinkosi; wasebusa iminyaka engamatshumi amahlanu lanhlanu eJerusalema .

1 UManase wayeleminyaka elitshumi lambili esiba yinkosi; wasebusa iminyaka engamatshumi amahlanu lanhlanu eJerusalema ^a. 2 Kodwa wenza okubi emehlweni eNkosi, njengamanyala ezizwe iNkosi eyazixotsha elifeni phambi kwabantwana bakoIsrayeli. 3 Ngoba wabuya wakha indawo eziphakemeyo uyise uHezekhiya ayezidilizile, wamisela oBhali amalathi, wenza izixuku, wakhothamela ibutho lonke lamazulu, walikhonza. 4 Wasesakha amalathi endlini yeNkosi, iNkosi eyayithe ngayo: EJerusalema ibizo lami lizakuba khona phakade. 5 Wasesakhela ibutho lonke lamazulu amalathi emagumeni womabili endlu yeNkosi. 6 Yena wenza abantwana bakhe badabule emlilweni esihotsheni sendodana kaHinomu ^b; wasechasisa izibonakaliso, wenza imilingo, wenza ubuthakathi, wasebenza labalamadlozi labalumbayo. Wenza okubi kakhulu emehlweni eNkosi, ukuyithukuthelisa ^c. 7 Wasebeka isifanekiso esibaziweyo sesithombe ayesenzile endlini kaNkulunkulu, uNkulunkulu owayethe ngayo kuDavida lakuSolomoni indodana yakhe: Kulindlu, leJerusalema engiyikhethe kuzo zonke izizwe zakoIsrayeli, ngizabeka ibizo lami kuze kube nininini ^d. 8 Kangisayikususa unyawo lukaIsrayeli luphume elizweni engalimisela oyihlo, kuphela uba bezananzelela ukwenza konke engibalaya khona, ngokomlayo wonke lezimiso lezimiselo ngesandla sikaMozisi. 9 Ngakho uManase waduhisa uJuda labahlali beJerusalema, ukwenza okubi okwedlula izizwe iNkosi eyazichitha phambi kwabantwana bakoIsrayeli.

10 INkosi yasikhuluma kuManase lebantwini bakhe, kodwa kabalalelanga. 11 Ngakho iNkosi yabehlisela abaphathi bebutho inkosi yeAsiriya eyayilabo ^e; basebethumba uManase ngameva ^f, bambopha ngamaketane ethusi, bamusa eBhabhiloni ^g. 12 Kwathi esecindezelwe wancenga ubuso beNkosi uNkulunkulu wakhe ^h, wazithoba kakhulu phambi kukaNkulunkulu waboyise ⁱ. 13 Wasekhuleka kuye, njalo wancengeka ngaye, wezwa ukuncenga kwakhe, wambuyisela eJerusalema embusweni wakhe ^j. Ngakho uManase wazi ukuthi iNkosi yiyo enguNkulunkulu ^k.

14 Lemva kwalokho wakha umduli ongaphandle komuzi kaDavida ngentshonalanga kweGihoni esihotsheni ^l, kwaze kwaba sekungeneni kwesango lenhlanzi ^m, wabhoda iOfeli, wawenza waphakama kakhulu. Wabeka labaphathi bamabutho kuyo yonke imizi ebiyelweyo koJuda. 15 Wasesusa onkulunkulu bezizweni ⁿ lesithombe endlini yeNkosi, lawo wonke amalathi ayewakhile entabeni yendlu yeNkosi, laseJerusalema, wakuphosela ngaphandle komuzi ^o. 16 Wasesakha ilathi leNkosi, wahlabela phezu kwalo iminikelo yokuthula leminikelo yokubonga. Wathi kuJuda kakhonze iNkosi, uNkulunkulu kaIsrayeli ^p. 17 Loba kunjalo abantu babelokhu behlaba endaweni eziphakemeyo, kuphela eNkosini uNkulunkulu wabo ^q.

18 Ezinye-ke zezindaba zikaManase, lomkhuleko wakhe kuNkulunkulu wakhe ^r, lamazwi ababoni abawakhuluma kuye ngebizo leNkosi uNkulunkulu kaIsrayeli ^s, khangela, kusezindabeni zamakhosi akoIsrayeli ^t. 19 Umkhuleko wakhe-ke ^u, lokuncenga kwakhe kuNkulunkulu, lesono sakhe sonke, lesiphambeko sakhe ^v, lezindawo akha kuzo indawo eziphakemeyo, njalo wamisa izixuku lezithombe ezibaziweyo ^w, engakazithobi ^x, khangela, kubhaliwe emazwini ababoni ^y.

20 UManase waselala laboyise; basebemngcwaba endlini yakhe. UAmoni indodana yakhe wasesiba yinkosi esikhundleni sakhe ^z.

Ukubusa kukaAmoni

21 UAmoni wayeleminyaka engamatshumi amabili lambili esiba yinkosi; wasebusa iminyaka emibili eJerusalema ^aa. 22 Wasesenza okubi emehlweni eNkosi njengokwenza kukaManase uyise; ngoba uAmoni wahlabela zonke izithombe ezibaziweyo uManase uyise ayezenzile, wazikhonza ^ab. 23 Kodwa kazithobanga phambi kweNkosi njengokuzithoba kukaManase uyise ^ac, kodwa uAmoni lo wandisa icala. 24 Inceku zakhe zasezimenzela ugobe, zambulala endlini yakhe.

25 Kodwa abantu belizwe batshaya bonke labo ababenzele inkosi uAmoni ugobe; abantu belizwe basebebeka uJosiya indodana yakhe ukuba yinkosi esikhundleni sakhe.